“තුප්පාක්කි”, “කත්ති” වගේ සුපිරි බ්ලොක්බස්ටර් චිත්‍රපට අධ්‍යක්ෂණය කරපු ඒ. ආර්. මුරුගදෝස් එක්ක ජනප්‍රිය නළු සිවකාර්තිකේයන් එකතු වුණාම මොන වගේ නිර්මාණයක් බිහිවෙයිද? “Madharaasi” කියන්නේ මේ ප්‍රශ්නයට ලැබෙන උත්තරය. මේ දෙදෙනාගේ පළමු සෘජු අධ්‍යක්ෂණ-නළු සංයෝගයෙන් එන “Madharaasi” චිත්‍රපටය, Psychological Action Thriller ගණයට අයත් වෙන, වෙනස්ම ආරක කතාවක්.

තමිල්නාඩුව පුරා ගිනි අවි ජාලයක් පතුරුවා “තුවක්කු සංස්කෘතියක්” ඇති කරන්න උත්සාහ කරන උතුරු ඉන්දියානු අපරාධ කල්ලියක් ඉන්නවා. ඔවුන්ගේ සැලැස්ම තමයි ට්‍රක් රථ පහක් පුරවා ගිනි අවි ප්‍රාන්තය පුරා බෙදාහැරීම. මේ මහා විනාශය නවත්වන්න උත්සාහ කරන්නේ දක්ෂ NIA නිලධාරියෙක් වන ප්‍රේම්නාත්. හැබැයි මේ මෙහෙයුම අතරතුරේදී ඔහුට දරුණු ලෙස තුවාල සිද්ධ වෙනවා, අපරාධකරුවන් අවි තොගයත් අරගෙන පැනගන්නවා.

මේ සිදුවීමත් එක්කම, රෝහලේදී ප්‍රේම්නාත්ට අහම්බෙන් වගේ තරුණයෙක්ව මුණගැහෙනවා. ඔහු නමින් රඝුරාම්. රඝු කියන්නේ තමන්ගේ පෙම්වතිය දාලා ගිය නිසා ජීවිතය ගැන කලකිරිලා, සියදිවි නසාගන්න පවා උත්සාහ කරන සාමාන්‍ය තරුණයෙක්.

සාමාන්‍ය තරුණයෙක්, අසාමාන්‍ය මෙහෙයුමක

කතාවේ කුතුහලයම ඇතිවෙන තැන තමයි මේ. රටේ ආරක්ෂාවට විශාල තර්ජනයක් වෙච්ච අවි ජාවාරමක් නවත්වන මෙහෙයුමකට, ජීවිතේ එපා වෙලා ඉන්න රඝු වගේ සාමාන්‍ය කෙනෙක්ව සම්බන්ධ වෙන්නේ කොහොමද? ප්‍රේම්නාත්, රඝු තුළින් දකින විශේෂත්වය මොකක්ද?

රඝු කියන්නේ අපි හිතන තරම් සාමාන්‍ය කෙනෙක් නෙවෙයි. ඔහු දුර්ලභ මානසික තත්ත්වයකින් පෙළෙන කෙනෙක්. ඒ, කුඩා කාලයේදී මුහුණදුන් කම්පන සහගත සිදුවීමක් නිසා හටගත් තත්ත්වයක් නිසා. රඝූ කියන්නෙ කරදරයට පත් වෙන ඕනෙම කෙනෙක්ව බේරගන්න ටයිප් එකේ කෙනෙක්. 

ඉතින්, කිසිම දෙයක් නැතිකරගන්න බයක් නැති, මැරෙන්න වුණත් සූදානමින් ඉන්න රඝු වගෙ කෙනෙක්ව, රට වෙනුවෙන් කරන මාරාන්තික මෙහෙයුමකට යොදාගන්න පුළුවන් කියලා ප්‍රේම්නාත් තීරණය කරනවා. ඔහු රඝුව මේ දරුණු අපරාධ කල්ලිය ඇතුළට රිංගවනවා.

සිවකාර්තිකේයන්ව අපි මෙතෙක් දැකලා තියෙන විකට සහ පවුලේ චිත්‍රපටවලට වඩා හාත්පසින්ම වෙනස්, බරපතළ සහ ක්‍රියාදාමවලින් පිරුණු චරිතයක් “Madharaasi” තුළින් බලාපොරොත්තු වෙන්න පුළුවන්. ප්‍රධාන දුෂ්ට චරිතයට පණ පොවන්නේ සුප්‍රකට ඇක්ෂන් නළු විද්‍යුත් ජම්වාල්. ඉතින්, තිරයේ සුපිරි සටන් ජවනිකා රැසක් දකින්න ලැබෙනවා. අනිත් පැත්තෙන්, සුපිරි සංගීත අධ්‍යක්ෂක අනිරුද් රවිචන්දර්ගේ සංගීතයත් චිත්‍රපටයට විශාල ශක්තියක්.

තමන්ගේ මානසික ගැටලු එක්ක සටන් කරන අතරේ, රටම විනාශ කළ හැකි දැවැන්ත අපරාධ ජාලයකට එරෙහිව රඝු කරන සටන කොහොම එකක් වෙයිද? ඔහුට මේ මෙහෙයුම සාර්ථක කරගන්න පුළුවන් වෙයිද? මේ ප්‍රශ්නවලට උත්තර දැනගන්න නම්, කුතුහලයෙන් සහ ක්‍රියාදාමයෙන් පිරුණු “Madharaasi” නරඹන්නම වෙනවා.