2004 දෙසැම්බර් 26 කියන්නෙ ශ්‍රී ලංකාවේ අපට පමණක් නොව මුලු මහත් ලෝකයම කම්පාවට පත් කල දවසක් බව ඔබට මතක ඇති. එදා ඉන්දුනීසියාවේ සුමාත්‍රා දූපත් අසල මුහුදු පතුලේ හටගත් භූ කම්පනයෙන් ලක්ෂ ගණනක් ජීවිත ලෝකයට අහිමි වුනා. ඉතින් අද මම ඔයාලට අරගෙන ආවෙ සුනාමි රකුසාට ගොදුරු වූ පවුලක් මුහුණ පෑ සත්‍ය සිදුවීම් ඇසුරෙන් ගොඩනැගුනු චිත්‍රපටයක්. මේක අධ්‍යක්ෂණය කරල තියෙන්නෙ Juan Antonio Bayona විසින්. ජාත්‍යන්තර චිත්‍රපට දර්ශකයේ මේ සඳහා ලකුණු 7.7ක් හිමිවී තිබෙනවා.

මෙන්න මෙහෙමයි කෙටියෙන් කතාව. මාරියා සහ හෙන්රි ඔවුන්ගේ පුතුන් තිදෙනා සමග තායිලන්තයේ වෙරලාසන්න නිවාඩු නිකේතනයක නිවාඩුවක් ගත කරන්න යනව. උදේ කාලයේ හැමෝම විනෝදයෙන් ඉන්නකොට එක පාරටම මහා ශබ්දයක් නගමින් ඉතා උස්වූ මුහුදු රළ ගොඩට එන්න ගන්නව. හැමෝමව වතුරෙ ගහගෙන යනව. දැන් කොහොමහරි ඉතුරු වෙලා ඉන්නෙ බිරිඳ සහ වැඩිමහල් පුතා ලූකස් විතරයි. එතනින් පස්සෙ මේ දෙන්න ලොකු වෙහෙසක් දරනව පවුලෙ අනිත් අයව හොයා ගන්න. ලූකස්ගෙ අම්මට බරපතල ලෙස තුවාල සිදුවෙලා තියෙන්නෙ…ඉතින් මේ පුංචි ලූකස් තමන්ගෙ උපරිම හැකියාවෙන් කටයුතු කරනව තමන්ගෙ අම්මවත් බේරගෙන පවුලෙ අනිත් අයව හොයා ගන්න. ඒ සමඟ බැඳුනු සිදුවීම් දාමයක් තමයි මේ ෆිල්ම් එකෙන් පෙන්වන්නෙ.

මනුෂ්‍යත්වය, එකිනෙකාට උදව් කිරීම, මිනිසුන් අසරණ වී හඬා වැලපීම, ජීවිතය බේරාගන්න මිනිසුන් දරණ වෑයම, සුනාමි රළ පහර ගොඩබිමට කඩා වැදුන ආකාරය ආදී සියලුම දේවල් ඔයාලට බලාගන්න පුලුවන්. සුනාමි අත්දැකීමට මුහුණ දී නැති කෙනෙක්ට වුනත් මේ ෆිල්ම් එක බලද්දි, ඒ මොහොතෙ අසරණ වුනු මිනිසුන්ට දැනුන හැඟීම නිසැකවම දැනෙයි. ඔබත් සුනාමියට මුහුණ දීපු කෙනෙක් නම් ඒ මතකය අලුත් කරයි. එදා සුනාමියට මාත් මුහුණ දුන්නා.. ඒ නිසා මේ චිත්‍රපටිය බලද්දි එදා සිදු වුන දේ ආයෙත් මගේ මතකයට නැගුන. ඉතින් මම කියන්නෙ සුනාමියට හැබෑටම මුහුණ නොදුන් අය මේ චිත්‍රපටය අනිවාර්යෙන්ම බලන්න. මොකද සුනාමිය කියන්නෙ අපි හැමෝගෙම සිත් තුල සදා නොමැකෙන මතක සටහන් තැබූ ඛේදවාචකයක් නිසා. ඒ නිසා කැමති අය අරගෙන බලන්න..

• English
• server21