කාලෙකින් හොඳ sci-fi ෆිලුමක් බැලුවේ නැද්ද? ඒ එක්කම හොරර් වයිබ් එකත් තියෙන ඇක්ෂනුත් තියෙන ඒ අස්සේ ආදර කතාවකුත් තියෙන ෆුල් පැකේජ් එකක් බලමුද? මම මේ අරගෙන එන්නේ Apple TV ඔස්සේ උණු උණුවෙම ඊයේ නිකුත් උන The Gorge කියන සුපිරි ෆිලුමයි. චිත්‍රපටයේ අධ්‍යක්ෂක මහත්මයා නිසාම මේක එනකන් ඇහැ ගහගෙන හිටියේ. ඔයාලා ආසාවෙන් බලපු Sinister (2012), Soctor Strage (2016), Deliver Us from Evil (2014), The Black Phone (2021) වගේ ගුණාත්මක නිර්මාණ ගෙනාපු Scott Derrickson මහත්මයා තමයි මේ ෆිලුමත් අධ්‍යක්ෂනය කරලා තියෙන්නේ.

Sci-Fi | Horror | Action යන කාණ්ඩයන්ට මේ චිත්‍රපටය හොඳ විචාරක පැසසුම් එක්ක 82%ක ගූගල් පරිශීලක මනාපත් Rotten Tomatoesහි 64%ක දැවැන්ත අගයකුත් හිමි කරගන්න සමත් වෙලා තිබෙනවා. ප්‍රධාන චරිත විදියට Tpm Gun: Maverick (2022), Fantastic Four (2015) යන නිර්මාණ තුලින් හමුවූ Miles Teller ලීවයි කේන් ලෙසත්, ජනප්‍රිය සුරූපී නිළි Anya Taylor-Joy ඩ්‍රාසා ලෙසත්, Alien චිත්‍රපට මාලාවේ එලන් රිප්ලි ලෙස අතිශය ජනප්‍රියවූ Sigourney Weaver බර්ත්ලමිවු ලෙසත්, රංගනයෙන් දායක වෙනවා.

ලීවයි කේන් කියන්නේ හිටපු මැරීන් සෙබළෙක් මෙන්ම අති දක්ෂ ස්නයිපර් වෙඩික්කරුවෙක්. එයාගේ දක්ෂකම නිසාම ලොව හොඳම ස්නයිපර්වරු 5 දෙනා ඇතුලේ ලීවයිත් ඉන්නවා. හැබැයි මෙයා කාත් කවුරුවත් නැතුව, තනියම අරමුණක් නැතුව කුළී භටයෙක් විදියට තමයි ඉන්නේ. ලීවයි මෙහෙම ඉද්දි දවසක් හමුදා ලොක්කෙක් මෙයාට අතිශය රහසිගත මෙහෙයුමක් දෙනවා. ඒක කොච්චර රහසිගතද කියනවනම් ලීවයිට යන්න තියෙන්නේ කොහෙද, කරන්න තියෙන්නේ මොනාද කියලවත් එයාට හරියට දැනගන්න දෙන්නේ නෑ. කොහොමින් හරි තමන්ගේ රාජකාරිය කරන්න ලීවයිට යන්න වෙන්නේ ඉන්න තැනවත් හරියට නොදන්න රටක තියෙන විශාල දුර්ග මාර්ගයක තියෙන මුර පළකටයි. ඉතිං මෙතන කලින් වැඩ කරපු කෙනා යන්න කලින් ලීවයිට ජිවීතේට අහපු නැති අමුතුම තාලේ උපදෙස් මාලාවක් දෙනවා. අන්න එතකොට තමයි ලීවයිට තේරෙන්නේ මේක තමන් හිතපු විදියේ රාජකාරියක් නෙමෙයි කියලා. ලීවයිට ලැබෙන උපදෙස් මොනවද? මේ දුර්ග මාර්ගයට මුර පළක් ඕන වෙන්නේ ඇයි? ඒවට උත්තර ඔයාලා මේක බලලම දැනගන්න.

වැඩි විස්තර කියලා ඔයාලගේ කුතුහලය නැති කරන්න ඕනනෑනේ. කෝකටත් කියලා ඔයාලා චිත්‍රපටයේ පූර්ව ප්‍රචාරක පටය නරඹලා හිටියනම් මේකට තවත් කැමති වෙයි කියලා මම හිතනවා.